كل ماتــريـــد مــعرفــته عن دبلــوم التأهيــل التــربــوي
 

السلام عليكم ورحمة الله وبركاته

لما تخرجت السنة الماضية من قسم اللغة الانكليزية بكلية الآداب العظيمة.. سمعت نصائح كتييييرة بتقلّي كمّلي دراسات عليا
ناس ينصحوني بالماجستيرات..
وناس ينصحوني بالدبلوم..
وأنا فتت بستين حيط..وما كنت ألاقي شي يهديني..

لهيك.. والحمدلله بعد ما هلأ تخرجت وأخدت الدبلوم..
حبيت أعطيكم كل شي معلومات وأجوبة عن التساؤلات اللي ممكن تخطر ببالكم عن دبلوم التأهيل التربوي..


أول شي..
بتمنى أي طالب عبيفكر بالدبلوم.. إنو يفكر لقدّام شوي..
هل رح تشتغل/ي بمجال التدريس.. أو التوجيه..
هل مفكر/ة إنو تسافروا خارج البلاد..للتدريس..؟؟؟
إذا كانت إجابتكم ..نعم.. فعليكم بدبلوم التأهيل التربوي..
أنا ما بدي أحط من قيمة الماجستير..
بس صدقوني.. الحمدلله معدلي كان جيد.. وكان ترتيبي عدفعتي رائع..بس مع ذلك فكرت بموضوعية شوي..
الماجستير مو معترف فيه برا سورية..(حسبما سمعت من مصادر عديدة)
وبنفس الوقت.. شهادة الدبلوم جدا جدا جدا مطلوبة
بالإضافة للخبرة يللي بتكتسبوها .. في زيادة 3% عراتب الأستاذ الحاصل على دبلوم التأهيل التربوي..
نقطة ثانية..* جميع المدارس الخاصة تشترط على الأساتذة عندها يكون معهم دبلوم تأهيل تربوي..
نقطة إضافية..* مارح ينحصر عملك بمجال تدريس الحلقات الأولى.. بل رح تدرّس شريحة الحلقة الثانية من التعليم الأساسي والتعليم الثانوي..

وطبعا الأفضلية في مسابقات تعيين المدرسين بتكون لحملة دبلوم التأهيل التربوي..

وطبعا الأفضلية لمسابقات تعيين موجهين تربويين بتكون لحملة دبلوم التأهيل التربوي..

هاد بالنسبة لأهمية الدبلوم...

سأعود بإذن الله مع قسم آخر من هذا الموضوع يللي بتمنى إنو يتثبّت.. عالأقل تفاديا للقدر الهائل من المواضيع يلي امتلأ القسم فيها وبكل واحد منها يوجد تساؤل واحد..

نكمل.. بالنسبة للتسجيل في دبلوم التأهيل التربوي..
 

..هلأ انتهينا من أول نقطة يللي هي التعريف بأهمية دبلوم التأهيل التربوي على أرض الواقع

ننتقل لنقطة ثانية..

التسجيل في دبلوم التأهيل التربوي..
بالنسبة للتسجيل فهو يبدأ بمفاضلة تعلنها كلية التربية..

يتقدم إليها الطلاب من الأقسام التي تحددها الكلية..

والأوراق المطلوبة للمفاضلة هي:
*ورقة غير موظف (بتقدروا تحصلوا عليها من مركز البريد بالجميلية).
*لاحكم عليه
*صور شمسية
*نشرة استعلامات توَزَّع من مبنى كلية التربية عند إعلان بدء التسجيل في المفاضلة

وبعد فترة يتم إصدار نتائج القبول في المفاضلة..
وطبعا يعتمد المعدّل المطلوب على مدى حاجة وزارة التربية لمدرِّسين مؤهّلين في قسم ما..

مـــواد دبــلــوم التأهيـــل التــربـــوي
 

هلأ بالنسبة لمواد الدبلوم...

في قسمين للمواد.. نظري وعملي
وطبعا طلاب الدبلوم مطالبين تحقيق نسبة دوام لا تقلّ عن 75% في الأقسام العملية
أما النظري فمو مطالبين بالدوام...

مواد الدبلوم باللغة العربية.. ومشتركة بين جميع الطلاب.. ماعدا مادة واحدة هي مادة الاختصاص.. ويدرسها كل قسم وحده في قاعات منفردة..
يعني طلاب الانكليزي بيدرسوا المادة بالانكليزي وطلاب الفرنسي بالفرنسي وطلاب التاريخ بيدسوها بما يتعلق باختصاصهم...وهكذا
هي المادة تبقى مستمرة طيلة الفصلين يعني مافي إلها فحص نصفي.. فقط فحص نهائي آخر العام..وهي من المواد العملية يللي ضرووووري تحضروها

باقي المواد العملية هي:
*القياس والتقويم (مادة عبارة عن رياضيات وكيفية حساب المعدلات والعلامات للطلاب وطرق الاختبارات والتقويمات) طبعا للمادة قسم نظري وقسم عملي.. والمطلوب حضوره هو القسم العملي

*تقنيات التعليم (مادة عبارة عن تعريف بوسائل التعليم وتقنياته منذ نشوئها وحتى دخول التكنولوجيا والمادة قسمين نظري وعملي ..المطلوب حضوره هو القسم العملي وفيه يُطالب الطلاب بتحضير وسائل تعليمية كل أسبوع..ويتم تقييمها من قبل الأستاذ المشرف وفي نهاية العام توضع فيما يسمى بالحقيبة التعليمية جميع أعمال الطالب طوال العام ويتم وضع علامة عليها)

*التربية العملية (هي المادة مافيها نظري بل هي مادة ممتعة ويتم فيها تقسيم الطلاب إلى فئات ولكل فئة موجه مشرف عليها حيث يتم التنسيق بين الطلاب والمشرف لإعطاء دروس في البيئة التعليمية الواقعية يعني في المدارس ثم يتم تقييم الطالب من قبل الموجه وزملائه الطلاب وفي نهاية العام يحصل الطالب على علامة على أعماله طوال العام)

هاد بالنسبة للمواد العملية

مشكوورة كتير ع هالمعلومات الحلوة و انشالله بتحقي الي ببالك عن قريب
:others1:

مــواد الدبلـــوم النظــرية
 

السلام عليكم مجدداً...

هلأ وصلنا لمواد الدبلوم النظرية..

هي عبارة عن المواد التالية ورح أعطي فكرة صغيرة عن كل مادة مع إنو مبين من أسماء المواد محتواها..

*علم النفس التربوي: بالنسبة للي دراستن أدبي.. فهالمادة كتيييييير شبيهة بمادة علم النفس بالفلسفة بالبكالوريا.. وللي دراسته كانت علمي بقله..بهالمادة في مبادئ علم النفس العام وعلاقة علم النفس العام بالتربية..ودراسة الشخصية ونظريات الشخصية.

*أصول التدريس: مادة نظرية بحتة تقوم على تعريف التدريس والتعريف بأصوله ثم تأتي بمبادئ ونظريات التدريس.

*التربية العامة: تشمل التربية العقلية/التربية الجسدية/التربية الأخلاقية/التربية الاجتماعية/التربية القومية/العوامل المؤثرة في التربية/أنواع التعليم.

*فلسفة التربية: بالنسبة للفرع الأدبي: هالمادة شبيهة بمادة الأخلاق في فلسفة البكالوريا.
أما الفرع العلمي..فهي المادة هي عبارة عن تطور الفلسفة وفلسفة التربية من أفلاطون حتى البراغماتية.

*الصحة النفسية: كمان هالمادة شبيهة بعلم النفس العام. مادة حلوة بتحكي عن التكيف أو سوء التكيف, الصراع وأنواعه, االآليات الدفاعية. بالإضافة لنظريات الشخصية.

*علم نفس الطفولة والمراهقة: واضح من الاسم.

*التربية المقارنة: عبارة عن آليات المقارنة بين النظام التربوي الموجود في بلد.. ونظام تربوي آخر في بلدان أخرى.. وبيحكي بالتفصيل عن النظام التربوي بعدة بلدان منها فرنسا/انكلترا/أميركا/اليابان/الهند/الصين/ألمانيا

*تقنيات التعليم: طبعا القسم النظري بيحكي عن الوسائل التعليمية من ناحية نظرية

*القياس والتقويم:القسم النظري منها بيحكي عن طرق التقويم وآليات القياس,وأنواعه.

*المناهج: تحكي عن تطور مفهوم المنهاج بين القديم والحديث..أقسام المنهاج..أنواعه..

أنا عبحكي من تجربة شخصية..لذلك أي شي بكون سهيت أو غفلت عنه بدون قصد بتمنى تذكروني فيه..
وبتمنى إذا في أي تساؤل تسألوني ولا تترددوا وأنا رح أحاول أجيبكم على قدر المستطاع..

أهلين أخي...
شكرا وآآآآآآآآآآآآآآآمييييييييييييييين

:emot112:شكراً كتير أختي الكريمة معلومات قيمة جدا والله يجزيك الخير
أنا عندي طموح أني ادرس دبلوم بس يمكن معدلي مايسمح بالتأهل للدبلوم لانو هو 67فما مابعرف الله يختار الخير
بس بدي اسأل اديش كان المعدل اللي طلبوه هديك السنة للارشاد ازا عندك معلومات عن هالموضوع بتمنى تجاوبيني ولك جزيل الشكر
:thinking1:

شكرا كتير كتير Bright Pearl اثلجلت صدري يعني أغمض عيني وروح عالدبلوم ؟كلامك واضح بس الكل وانا واحد منهم لم أفكر في الدبلوم يوما ما لكن اليوم وعند تخرجي بدأت النصائح تأتيني ان ادخل دبلوم وكمان كتير بيقولولي بضيع ماستر مشان دبلوم. الواضح ان الماستر افخم كأسم بسسسسسسسسسسسسسس ما بعرف انا ضايع متل ماكنت انت السنة الماضية .ودمتم بخير

شكرا كتير الك bright pearl بس انا عندي سؤال واحد الك انا كمان خريجة السنة الماضية ومعدلي كان 59.47 برايك انا بقبل دبلوم عادي ولا موازي يعني قبلو السنة الماضية متل معدلي ولا لأ لانو بصراحة عجبني الدبلوم اكتر من الماستر وناوية قدم عليه بس خايفة معدلي ما يساعدني فارجو مساعدتك لانو ماشاء الله عليك شفتك خبرة بموضوع الدبلوم

ميييييية هلا..
هلأ على ما أذكر معدلات طلاب كلية التربية كانت عالية لهيك طلبوا معدلات عالية..بس عكل حال رح أتأكد أديش كان المعدل المطلوب لقسم الإرشاد وإن شاء الله رح أجاوبك بالتأكيد..
بس كنصيحة قدّمي.. يعني مارح تخسري شي..لأنو المعدل المطلوب صاير شغلة نسبية يعني إذا لازمن طلاب كتير من قسم الإرشاد فمارح يكون المعدل أعلى من هيك..