عزيزي المتظاهر السلمي هات ضميرك شوي واسمع

[القيصر إبراهيم]

قبل ماتقول محاربة الفساد....
روح شوف مين عامل الفساد....غير أبوك وعمك وخالك وجارك
وإبقى بس يوقفك شرطي المرور وأنت عم تحكي مع صاحبتك ؟
لاتحط بإيدو المعلوم وادفع المخالفة وقبل ماتقول حرررررية؟؟؟
علم ولادك الحرية وورجيني شورح يساووا فيك
وقبل ماتقول طوارئ روح شوف أميركا الساعة 4 العصر أخو أختو مابيحسن ينزل عالشارع
وقبل ماتقول زيادة رواتب شوف حالك أديش عم تشتغل بالنهار أكيد مو أكتر من 35 دقيقة
قبل ماتقول تعليم غير مختلط روح انقلع عأفغانستان
قبل ماتطالب بتحرير الجولان روح اخدوم عسكرية
وحاج تدور عطرق تتهرب وتفيش
قبل ماتشتكي من الراتب في اختراع اسمو واقي روح اشتريه وحاج تبظ ولاد وتقول حرام
قبل ماتشتكي من البطالة روح ادرس وتذكر عنا العلم ببلاش
أو تعلم شي صنعة لأنو مانا بسويسرا حتى نعطي رواتب للعاطلين عن العمل
قبل ماتقول إفراج عن معتقلين سياسيين روح شوف هالولاد الحرام جواسيس لمين؟؟؟
قبل ماتقول حرية الرأي تعلم تفك الحرف واستقر عرأي واحد
قبل ماتنتقد القيادات وتصير فهمان وهاد المحافظ عاجبك وهاد لأ تعلم تقبل نقد العالم لأنو لو حطيناك محافظ رح تنهب وتبلع ومارح تعمل شي للبلد
قبل ماتطلب تغيير قوانين وتحديث وتطوير خلي البنت عندك تتعلم وتقول رأيا....
قبل ماتقول الشغل دائر والحالة الاقتصادية زفت انقبر قوم فتاح بكير وبكفي تتفرج عالدش....
قبل ماتقول هلكونا الضرايب شوف حالك أديش عم تنصب وتربح وتزور ومحدا عم يحاسبك....
قبل ماتقول نظام روح لشي محل وانقبر وقف بالدور أو استنى ختيار يقطع الإشارة بدون ماتتحيون؟؟؟ وتزمر....
قبل ماتقول حضارة وتطوير لاتبصق بالشارع لأنو هي أرض الوطن وانشالله بيبزقوا عليك الشعب كلو....
قبل ماتقول إلنا مطالب لاتاكل هوا وتبيع صوتك بالانتخابات وتنتخب هالكم نصاب والكم مجرم كرمال كم ليرة....
وانتخب حدا يوصل صوتك بطريقة حضارية....
قبل ماتنقلع عامل حالك رايح تصلي تزكر شو عملت طول الأسبوع بتكزب وبتنصب وبالو رايح تصلي....
الله مارح يغفرلك إذا طلعت مع هالكم كلب تعوي....
قبل ماتقول الشعب يريد
أنا رح قلك الشعب شو بيريد؟
الشعب بريد تحطوا صرماية بتمكن وتخرسوا
لأنو ماضل غير الأرباط والحمير والبقر والنور والزعران اللي متلكن يحكوا....
لك والله والله هالشعب متل اللغم بس انشال الرص من على رقبتو
لينفجر ينفجر وينفجر....
ومابيلبقلكن غير العصاية
والعصا لمن عصا....
والله إني لأرى رؤوسآ قد أينعت وحان وقت قطافها
وإني لأرى الدماء ترقرق بين العمائم واللحى
أخوتي بالله عليكم
كفى كفى كفى
كفى تخريب فلن تجدون ما تبغون في بلد (الله حاميها)
لك عيب والله عيب نحن سوريا نحن بلد الأمن والأمان يصير فينا هيك
أنا أسأل ضميرك
هل ماقلته صحيح؟؟؟
رجاء لحدا ينطمز هالحكي مني وجر....
القيصر إبراهيم

[hana]

صارو السوريين فريقين
صار عنا مندس و عنا شبيح.. و كل واحد نازل بالتاني تدبيح…
صار عنا السني و العلوي , الدرزي والشيعي , عنا المسلم وعنا المسيحي ...
صرنا نسافر ع الشام بالطيارة.. وصرنا نخاف من كل صغيرة و كبيرة بالحارة
صار عنا المتطرف و العلماني .. وكل واحد بأفكاره متمسك أكتر من التاني ..
صار عنا خوف و صار عنا الم.. و صار بعيد عن عينا الأمل..
صرنا نفرق بين مظاهرة و مسيرة .. و نحنا بالأصل حيلتنا قصيرة ..
صار عنا أسامي للايام .. وعنا ناس بتسهر خايفة عالبلد و ناس بتنبسط و بتنام
.
و بعد اكتر من7500شهيد .... صار عنا آلاف الأيتام ..
.
الله يرحم كل سوري ..... كل بريء ..... كل شهيد ......

الله يحمي -اللي بقي- بهالبلد .......

[obaida]

قبل ماتقول محاربة الفساد....
روح شوف مين عامل الفساد....غير أبوك وعمك وخالك وجارك

حبيبي قول مين يلي طالع ناجي عطري من السجن وحطوا محافظ

وإبقى بس يوقفك شرطي المرور وأنت عم تحكي مع صاحبتك ؟
لاتحط بإيدو المعلوم وادفع المخالفة وقبل ماتقول حرررررية؟؟؟


عزيزي . إذا ما كنت ما بتعرف أن كل مكان من حلب له تسعيرة يدفعها الشرطي

رافعة الحجز يدفع عليها المساعد بالشهر 40 ألف والموتور 15 ألف والدويرية حسب مكانها دوار الشعار غير دوار الجامعة

مرة وقفنا شرطي .. طالعنا له دفتر السيارة والأوراق .. قال بعرف عندكم دفتر واوراق
عطوني يلي بدكم ياه

علم ولادك الحرية وورجيني شورح يساووا فيك

يا ترى في تناقض بين الحرية والأدب مثلاً ..

غريب يا أخي معقول .. انو حربكم هي حرب على الحرية يعني معترفين ان الظلم احسن

وقبل ماتقول طوارئ روح شوف أميركا الساعة 4 العصر أخو أختو مابيحسن ينزل عالشارع

لك يلعن ابو امريكا ويلي بحب امريكا
نحنا عمنحكي على سوريا .. شو جاب أمريكا بالقصة .

وقبل ماتقول زيادة رواتب شوف حالك أديش عم تشتغل بالنهار أكيد مو أكتر من 35 دقيقة

يا ريت ما تعمم .. وكل واحد يحكي على حالو

وإذا حدا حرامي ما يفكر كل الناس حرامية

قبل ماتقول تعليم غير مختلط روح انقلع عأفغانستان

ضرب تقلع رقبة العدو
الدراسات العلمية الحديثة أثبتت ان التعليم المختلط سبب في تراجع العلم
وخلينا نترك الطلاب يغازلون بعضهم أحسن

وبكرة لما بتجي بنتك على البيت معها رسالة من حبيبها .. بتشوف شو نتيجة التعليم المختلط


قبل ماتطالب بتحرير الجولان روح اخدوم عسكرية
وحاج تدور عطرق تتهرب وتفيش


قبل ماتشتكي من الراتب في اختراع اسمو واقي روح اشتريه وحاج تبظ ولاد وتقول حرام

لك عيب هالحكي ..
الرزق على الله .. والولد بيجي ومعه رزقه
والله عز وجل أقسم بكتابه قائلا ( ورزقكم في السماء وما توعدون فورب السماء إنه لحق مثل ما أنكم تنطقون )


قبل ماتشتكي من البطالة روح ادرس وتذكر عنا العلم ببلاش
أو تعلم شي صنعة لأنو مانا بسويسرا حتى نعطي رواتب للعاطلين عن العمل


والله في آلاف الخريجين ما عندهم عمل ... مو أزمة دراسة بس أزمة فهم .

قبل ماتقول إفراج عن معتقلين سياسيين روح شوف هالولاد الحرام جواسيس لمين؟؟؟

إييييييه كل

قبل ماتقول حرية الرأي تعلم تفك الحرف واستقر عرأي واحد




قبل ماتنتقد القيادات وتصير فهمان وهاد المحافظ عاجبك وهاد لأ تعلم تقبل نقد العالم لأنو لو حطيناك محافظ رح تنهب وتبلع ومارح تعمل شي للبلد

طيب تقبل نقدي لموضوعك كمان مع احترامي لشخصك

قبل ماتقول إلنا مطالب لاتاكل هوا وتبيع صوتك بالانتخابات وتنتخب هالكم نصاب والكم مجرم كرمال كم ليرة....
وانتخب حدا يوصل صوتك بطريقة حضارية....


انتخبنا .. وما شفنا وجه يلي انتخبنا ..

وللعلم : تأكد انو يلي مكتوب له بلوح الأمن ينجح رح ينجح ولو ما انتخبه احد


قبل ماتنقلع عامل حالك رايح تصلي تزكر شو عملت طول الأسبوع بتكزب وبتنصب وبالو رايح تصلي....
الله مارح يغفرلك إذا طلعت مع هالكم كلب تعوي....



هدول عبقولوا : الله أكبر .

فيا ريت تنتبه على كلامك

قبل ماتقول الشعب يريد
أنا رح قلك الشعب شو بيريد؟
الشعب بريد تحطوا صرماية بتمكن وتخرسوا

لأنو ماضل غير الأرباط والحمير والبقر والنور والزعران اللي متلكن يحكوا....

يمكن عبتحكي على الشبيحة
والمجرمين يلي طلعوا من السجن مشان يصيروا لجان شعبية

لك والله والله هالشعب متل اللغم بس انشال الرص من على رقبتو
لينفجر ينفجر وينفجر....
ومابيلبقلكن غير العصاية
والعصا لمن عصا....
والله إني لأرى رؤوسآ قد أينعت وحان وقت قطافها
وإني لأرى الدماء ترقرق بين العمائم واللحى
أخوتي بالله عليكم
كفى كفى كفى
كفى تخريب فلن تجدون ما تبغون في بلد (الله حاميها)

إي والله يا ريت تحكي مع الجيش السوري .. تقول له يوقف المدفعية

شو شايف مع الشعب دبابات .. ولااا طيران ولااااا سجون

يعني انت مبسوط للقتل

الله يصلحك ويهديك أحسن الشي .. معقول يا أخي هالكلام
انا ضد قتل المدنيني والعكسريين والأمنيين
لأني كلنا سوريين
ودماؤنا حرام

بس بالله عليك : من دمر المساجد والبيوت وهجر الناس و..

وإذا بدك تبرء الجيش بدي أذكرك بشغلة معروفة لكل العالم
ونحن السوريين إلى الآن لا يحبنا الكثير من اللبنانيين من أجلها

اسأل شو عمل الجيش السوري بلبنان

ويلي عمل هالشي هنيك ممكن يعمله ببلده مرة تانية

لك عيب والله عيب نحن سوريا نحن بلد الأمن والأمان يصير فينا هيك
أنا أسأل ضميرك

عيب على ميييييييين ؟

هل ماقلته صحيح؟؟؟

لأ حسب رأيي

رجاء لحدا ينطمز هالحكي مني وجر....

رجاء تقبل نقدي لك .. ولا تنفعل

[سهيل900]

انا معك اخي القيصر ابراهيم التظاهر اهم شي مايصير عحساب ناس تانيين متل الجامعة مثلا ولك اقسم بالله قرفتونا الجامعة

[Ledy]

الله محيك استاذ عبيدة حكيت الي كنت حابة احكيه واكتر

بس ياحيف على الي بشوف شباب بلدو عم يقتلو وبقول خليهم بيستاهلو
صدق القائل .. اذا لم تستحي فأصنع ماشئت ..

[marar]

يا استاذ براهيم يا قيصر يا ...




لو فيك شوية احساس مانزلت هالموضوع


انت نزلت هالموضوع بس ياريت كان في شوية احترام ....

من وين جايب هالكلمات

رح سميك شبيح المنتدى هاد بيلبقلك

[القيصر إبراهيم]

أخ عبيدة أتقبل نقدك وأحييك وأحيي كل مواطن شريف في وطني الحبيب سوريا أنا قبلت نقدك وهلأ أنت لازم تسمعني إذا بتريد
أنت عم تحكي عن شرطة المرور وأنو كل منطقة أو كل دورية تسعيرتا بتختلف عن غيرا طيب سؤال مين شرطة المرور؟؟؟ أنا رح أجاوبك شرطة المرور هي عناصر أفرادا عربيين سوريين والفساد بيبدأ من الشرطي وأنت طالع وثق تماما أنو مابيرتشي إلا كل قليل ذمة ضمير وبعض ضعفاء النفوس
وحكيت حضرتك كمان عن تناقض الحرية والأدب والاعتراف بالظلم رح جاوبك : يا أخ عبيدة من وقت ماطلعوا ولاد الحرية والعراعرة تحرم علينا النوم ببيوتنا مرتاحين وصار (الشعب الحر) يعتمد عالاختطاف والاغتصاب والتشليح وسلب أموال الغير وسيلة لكسب مآرب أخرى
وأنت حكيت عن موضوع أميركا رح جاوبك : أنا حطيت أميركا مثال لأنو بلد حر وديمقراطي وعم يدعم حركة العصيان المسماة ب (الجيش الحر)
أنا لما قلت هدول عم يعووا كان قصدي عالكلام اللي بينقال متل حرية أو الموت ولا المذلة
وأنت عم تحكي عن الجيش السوري أنت مفكر أنو الجيش مبسوط بهالحالة هي بعدين مين الجيش؟؟؟ مو أخوي وأخوك وعمك وجارك وابن خالك

[obaida]

أخ عبيدة أتقبل نقدك وأحييك وأحيي كل مواطن شريف في وطني الحبيب سوريا أنا قبلت نقدك

أهلا بك أخ ابراهيم .. شكرا لك لقراءة كلامي وردي


أنت عم تحكي عن شرطة المرور وأنو كل منطقة أو كل دورية تسعيرتا بتختلف عن غيرا طيب سؤال مين شرطة المرور؟؟؟ أنا رح أجاوبك شرطة المرور هي عناصر أفرادا عربيين سوريين والفساد بيبدأ من الشرطي وأنت طالع وثق تماما أنو مابيرتشي إلا كل قليل ذمة ضمير وبعض ضعفاء النفوس

بالتأكي كما ذكرت أخي .. لا يرتشي إلا ضعاف النفوس
لكن حتى نكون واقعيين ولسنا منظرين .. يا حبيبي لما الشرطي والموظف متعود على الرشوة وانت ما بترشي ممكن يكمل معاملتك ؟ بالتأكيد .. لا

طيب المفروض لما بتشتكي عليه حدا يحاسبه .. بس ما شفنا ولا واحد تحاسب

بل نعرف كيف أن عناصر كل مخفر يتقاسمون مساء ما أتاهم من أموال في كل يوم من رئيس القسم إلى أصغر عنصر

وحكيت حضرتك كمان عن تناقض الحرية والأدب والاعتراف بالظلم رح جاوبك : يا أخ عبيدة من وقت ماطلعوا ولاد الحرية والعراعرة تحرم علينا النوم ببيوتنا مرتاحين وصار (الشعب الحر) يعتمد عالاختطاف والاغتصاب والتشليح وسلب أموال الغير وسيلة لكسب مآرب أخرى


يا عزيزي .. من أخرج المجرمين من السجون وضعاف النفوس من السجون اول هذه الأحداث .

وبعدين رح أحكي قصة حكيتها قبل هالمرة
في عندي واحد صديقي ساكن بشارع النيل .. تعرض لمحاولة اختطاف .. انتبه بعض جيرانه للمختطفين
فسارعوا وركبوا سيارة سزوكي
لحقهم السكان.. حتى دخلت السيارة إلى مبنى المخابرات الجوية

أنا لا أقول ان كل عمليات الخطف تدبر في الأمن .. لكن هناك ضعاف نفوس مهنتها السرقة
وتنسب نفسها للمعارضة ( باعتبارها المتهم الأبرز على الساحة )


أخي الخطأ يبقى خطأ بغض النظر عن مرتكبه: المعارضة - الدولة - الجيش - الأمن - الشعب

وإصلاح الناس لا يكون بإسقاط حكومة أو تغيير أشخاص إصلاح الناس يكون بتغيير النفوس

لكن للأسف لكثرة الأخطاء يئس الكثيرون من الحل فذهبوا إلى الخطوة الثانية

ما رأيك بقرار : إعفاء المنقبات من التدريس ؟
لا تقول : أعادوهم .. لأني ما أعادوهم إلى للتهدئة وبعد شهداء درعا
وللعلم : طلع قرار بإعادتهم .. لكن إلى الآن لم ينفذ

والله لما ذهبت لفحص المقابلة في التربية
سألتني اللجنة المخصصة بفحص مقدرة المدرسين على التدريس
فقط سألوني ثلاث أسئلة
( ما رأيك بالنقاب ... وهل تصافح هذه الآنسة .. وهل انت منتسب لحزب البعث )

وأنت حكيت عن موضوع أميركا رح جاوبك : أنا حطيت أميركا مثال لأنو زيزيبلد حر وديمقراطي وعم يدعم حركة العصيان المسماة ب (الجيش الحر)


قلت لك: يلعن ابو امريكا .. على أبو كل واحد بيتحالف مع أمريكا
لا ديمقراطي ولا شي .. كلاب ولاد كلب


أنا لما قلت هدول عم يعووا كان قصدي عالكلام اللي بينقال متل حرية أو الموت ولا المذلة

له يا أخي .. يعني أنت بترضى المذلة
هل ترضى أن يدوس ( لا سمح الله ) شخص على أخيك لأنه خالفه بالرأي
انت ضد المعارضة .. لا بأس .. رأيك ..
لكن هل ترضى أن يأتي أحد المعارضين ويقتلك أو يدوسك ( لا سمح الله ) لأنك ضده

بالـتأكيد : لا .. طيب لماذا ترضى العكس ؟

وأنت عم تحكي عن الجيش السوري أنت مفكر أنو الجيش مبسوط بهالحالة هي بعدين مين الجيش؟؟؟ مو أخوي وأخوك وعمك وجارك وابن خالك

لأ مو مبسوط .. والله يعين العساكر المجندين
بس يلي بوجه السلاح على الناس .. بعتقد رح أعيد النظر في العلاقة معه ولو كان أخي


بالنهاية : أشكرك لتقبل نقدي وأتمنى الخير لكل الناس

وندعو الله تعالى أن يعيد الأمن والأمان والاستقرار إلى بلدنا الحبيب

يجب علينا جميعا ان نكون يد واحدة لبناء بلدنا مهما اختلفت وجهات نظرنا .. وشكرا لاستماعك مرة ثانية

[جيبا]

لا حول ولا قوة إلا بالله
بس يلي بدي أعرفو حماة ديار ليش بيسرقوا لغاز من بيوت ناس ليش بيرموا مازوت دفايه ع سجادة ليش بيسرقوا سيارات لبشر ليش ليقصفوا لمساجد ليش ليقتل لحيوانات ويقتل لأطفال لك يلي بيقتل طفل شو متأمل منو!!!! هدول لازم يحمونا مو.....