معاناتي في ادلب

[احمد الحاج شعبان]

معاناتي في ادلب:

منذ ثلاث سنوات قادني حظي العاثر إلى تلك المحافظة لأعيش فيها السنوات التي كنت أتمنى أن اقضيها في إحدى الجامعات التي لطالما حلمت أن اقضي فيها أروع سنوات حياتي الدراسية لكن قدري أن أعاني في ادلب,
تبدأ المعاناة منذ أول يوم في الكلية حيث انك قادم إلى مكان جديد لا تعرف فيه أحدا وكأنك في عالم أخر من ذاك العالم الذي رسمته لحياتك الجامعية بعد كد السنوات السابقة في المدرسة التي لطالما تشوقت العودة إليها لأني كنت أجد فيها البهجة والسرور أكثر مما أجد اليوم في حياتي الجامعية التي يملئها التعب والضنك واعذروني يا أهالي ادلب الكرام أن أبوح بما في داخلي من الم .
ريثما تعرفت على مجموعة من الأصدقاء بعد أن عانيت وحيدا عددا من الأسابيع بدأت معاناة السكن الذي استلمناه بعد شهر من الدوام كنت اقضيها على الطرقات ذهابا إلى البيت ورجعة منه إلى الكلية كان بناء السكن غير مخصص كسكن جامعي وإنما هو منى للحرفيين تم استئجاره حيث يبعد عن الكلية حوالي 2,5 كيلو متر والصدمة التي لم أكن أتوقعها هي المواصلات حيث انه ليوجد نقل داخلي كما تعودت في حلب اكتشفت أن ادلب قرية صغيرة وذات خدمات متواضعة حيث كان النقل خاصا بالتاكسي والتي صدمتني انه ليس هناك عداد إنما هناك تسعيرة حتى لو صعدت متر واحد ستدفع التسعيرة كاملة فعزمنا أن نذهب مشيا كل يوم ونعود مشيا لمسلفة 2,5 كيلو متر و لك أن تتصور هذه المعاناة كل يوم وضع في بالك أن الدوام إجباري وتغيبك عن أي محاضرة سواء أكانت نظري أو عملي يستوجب غضب الدكتور منك وقد يؤدي إلى حرمانك من المادة وان لم يكن تنقص علامتك في العملي يقدر عدد الغيابات لكل واحد علامة ,في السنتين الأولى والثانية كانت المكتبة الخاصة بتنزيل الكتب والمحاضرات بجانب كلية الآداب التي تبعد عن الكلية مسيرة نصف ساعة ولك أن تتصور إذا احتجت قلم كم يجب أن تعاني حتى تحصل عليه أما الكتب والمحاضرات فلا تحدث فذلك ضرب أخر من المعاناة حيث أن ادلب خالية من الكتب الجامعية ويجب عليك تأمين الكتاب بنفسك على مبدأ{عسكري دبر حالك} أما في السنة الثالثة فحن علينا صاحب المكتبة التي كنا نتعامل معه وبعد محاولات مع الرجل وإقناعه بفتح مكتبة قرب الكلية كانت هناك مسألة الحرم الجامعي وان المكاتب الخاصة يجب أن تقع خارج هذا الحرم فكانت المكتبة على بعد 500متر والحمد لله هي نعمة كبيرة اذا
ما قورنت بالمكتبة الأولى نسيت أن اذكر أن كليتنا لم تجهز إلا منذ سنة حيث كانت أصوات الصواريخ وآلات البناء تعزف ألحانها الجازيّة في أنحاء كلية التربية ناهيك عن عذوبة أصوات العمال وتعليقاتهم الساخرة لربما عرضت جانب مهم من المعاناة في الجانب الخدمي لنأتي إلى الدراسة وحلقات البحث والوسائل التعليمية والجانب العملي للمواد الذي يتطلب منك نوعين من التعب تعب الفكر والبال وتعب الجيب حيث أن اقل وسيلة تعليمية أو اقل حلقة بحث تكلفك من الجهد والتعب والمصروف ما لا يمكنك أن تحتمله ثمان الدوام الإلزامي يعيدك إلى بيتك وكأنك موظف اقل يوم تعود في الساعة الرابعة عصرا حيث يكون قد ضرب الجوع في جسدك أطنابه وهد أعضائك ويكاد رأسك ينفجر من صرير أصوات الدكاترة في محاضراتهم التي تطول أحيانا إلى ساعتين ونصف دون أي استراحة ,كنت أعود بعد ذلك إلى السكن لأعمل ست بيت من الدرجة الأولى {اجلي –اشتري الخضار – افرم الخضرة – اطبخ }ومن ثم يجتمع الشباب لنتناول الوجبة الأولى والوحيدة في يومنا وبعد هذا اليوم الحافل أكثر ما تحتاج إليه هو أن تلقي بنفسك على سريرك وتطلق العنان لخيالك الجموح فتحاول أن ترضى بما قسمه الله لك في حياتك الجامعية وتكتفي بالتخيل انك تعيش في عالم افتراضي فيه حياتك الجامعية المثلى لتستيقظ في اليوم التالي مرعوبا!!؟ إنا في ادلب آه لنقوم قبل ما يسجلنا الدكتور غياب.

[alaakh88]

هل تعلم انه اكثر شيء اتحمد الله عليه هو انه قبلت بأدلب ولم اقبل بأي جامعة آخرى

[فارس الظلام]

أنا رحت للجامعة و فيها مكاتب و كتب و حلوة كتير وكلامك مبالغ فيه

[obaida]

هذا الألم الآن سيكون من ذكرياتك الجميلة في المستقبل

[حسبي الله]

السلام عليكم....ورحمة الله وبركاته :

رائع هو موضوعك أخي، في تصويره /مآسيك/في إدلب...وكأني بك قادم من المريخ لعالم ،لم تسمع عنه من قبل لتحيا فيه مفاجآت لا تخطر على بال....

*لنكن واقعين : ولنقل أن معظم ما قلته يشكل فعلا نقاط تستحق الوقوف من وجهة نظر البعض... لكن بالغت في وصفك للواقع ،فضلا عن أنك قدمت الواقع من وجهة نظرك /السلبية / لأبعد الحدود ...ولم تقدم الواقع كما هو.
*فاستميحك عذرا باستدراك النقاط التي ذكرتها :
1.

منذ ثلاث سنوات قادني حظي العاثر إلى تلك المحافظةلأعيش فيها السنوات التي كنت أتمنى أن اقضيها في إحدى الجامعات التي لطالما حلمت أناقضي فيها أروع سنوات حياتي الدراسية لكن قدري أن أعاني في ادلب,

أولا : ليس حظك العاثرقادك ...بل قدت نفسك بما جنت يداك وماحصلت من علامات وإلا لما كان لادلب شرف استضافتك في ربوعها متعلما يحترم نفسه ، و هذا بدلا من أن تحمد الله أنه قد اتيحت لك فرصة الدراسة لايهم أين وكيف ...

لكن وللأسف هذا هو حال معظم شبابنا : الهدف الأول من الحياة الجامعية خارج حدود العلم : ...رفقة +وانبساط+وحياة جديدة+مقصف+.../أكيد مهمات/ لكن بظن الهدف الأول للجامعات هو /العلم / ....وهاد الشيء الرئيسي ...بظن إنه موجود بكلية ادلب ...إذا بهمك وجوده طبعا.


2.أزمة السكن.....
مابعرف أيها أفضل: عدم وجود السكن ...أو جوده ...مع بعض السلبيات .
وبصفتي من يلي بسكن البنات فبخبركم أنه ، حاليا مابيبعد أكتر من 5.دقائق عن الجامعة والسكن يلي قاعدين فيه فعلامريح كتيررر باعتباره فندق تم استئجاره ....والأهم أنو وفر علينا كتير من المشاكل.


3.المواصلات .....وموقع الجامعة البعيد...
أكيد مشكلي لكن ، مابعرف إذا المفروض تكووون الجامعة بسوق الهال ...وبنص المدينة ...
أما المواصلات فأكيد بدك تتوقعها هيك طالما أنك بتعرف مسبقا أنك جاي على ضيعة *قرية* ادلب متل ما اتفضلت.

[حسبي الله]

4.مشكلة ،المكتبة .../يلي انتهينا من السنة الماضية من معاناتها /...+....تجهيز الكلية يلي أخد وقت :

خلينا نكون واقعين ...الكلية كلية محدثة ، وكانت بمراحلها الأولى...فما بعرف أي منطق بيقووول إني تكون خطوات البداية بأي مشروع بدووون مشاكل، وبدون عثرات ،وبدووون ضرائب ...إلا إذا كنت باليابان ففيك تدرس ببيتك بكل أريحية ...أو أنو يكون عنا مصباح علاء الدين....ونطلب منه إحداث كلية محترمة بطرفة عين...وبدون ضجة أو تعب.

هيك نحنا ....منحب كل شيء على الجاهز ...وبدون تعب ...وبدون ضرائب....
والأهم: أنو يلي عم يحكي عنه زميلي ..صار من الماضي... ويلي ما مصدق يجي ويشوف الكلية حاليا من أروع ما يكون ومجهزة بشكل رائع ، والأهم إني قيها طلاب علم وفيها علم....

بس مشكلتك مع حظك....أنك كنت من يلي دفعوا ضريبة أنهم كانوا من الدفعات الأولى بالكلية....

5.

إلى الدراسة وحلقات البحث والوسائل التعليمية والجانب العملي للمواد الذي يتطلب منكنوعين من التعب تعب الفكر والبال وتعب الجيب حيث أن اقل وسيلة تعليمية أو اقل حلقةبحث تكلفك من الجهد والتعب والمصروف ما لا يمكنك أن تحتمله ثمان الدوام الإلزامي.

رجعنا لنفس القصة .../غريب والله /إني ...أنا لما بكون اسمي طالب جامعي... وبدي أخد شهادة وربي أجيال ...

وبستغرب من إني مطالب **اتعب فكري ** بالدراسة أو بحلقات البحث....

مهاي هي أصلا دورك الرئيسي...... تدرس وتفكر وتتعب على إنك تبني عقلك ومعلوماتك ...إلا إذا ارجعنا لمبدأ الجامعة تسلاية مو دراسة.



*بالنسبة لتعب الجيب :الوضع نفسه بإدلب ونفسه بحلب ونفسه وين ماكنت >>> هاد أنت وشطارتك ... بحكمي معك ففيني قلك أنا أكتر مشروع أو عمل ،أوحتى شغل مادة التقنيات كله ما كلفني 200 ل.س...وحلقة البحث ما بتكلفني غير أجر طباعتها / وهاد حال كتيرين بعرفهم وبتعرفهم /.
يعني طالبنا ،بيعمل أي شيئء باستثناء يشغل عقله ويفكر ...فبيروح عند صاحب المكتبة وبيطلب مشروع أو عمل جاهز أو حتى حلقة بحث جاهزة >>> ووقت بيدفع فبيكون عم يدفع ثمن غبائه وكسله ... أو في مين بيدفع ثمن أنه بدو يظهر متميز بكلفة عمله يلي ما بيعرف عنه غير كم كلفه؟؟؟

[حسبي الله]

6.

ويكاد رأسك ينفجر من صرير أصوات الدكاترة في محاضراتهم التي تطول أحيانا إلى ساعتينونصف دون أي استراحة

هووون بدي وقف كتيرررر.... لأقول الغالبية العظمى من دكاترنا ،/والله من أفضل ما يكون رغم وجود استثناءات قليلة .

وعيب علينا بعد 4سنين تعبوا فيها معنا نقول // ويكاد رأسك ينفجر من صرير أصوات الدكاترة //...والله تعبوا معنا ، واستفدنا منهم ومن خبرتهم يلي ما لقيناها بالمقررات ذاتها....
* ولقلكم الدكاترة يلي عنا نفسهم دكاترة التربية بجامعة حلب....:

..د.أنور + د.اليماني + د.خالد الضعيف + د.جبران + د.السباهي + د.الزامل + د.يوسف
سعد ......وغيرهم .



ومعلومات جديدة ليلي ما بيعرفها عن *كلية التربية الثانية بأدلب* :

1. من السنة الأولى للرابعة....بعد الساعة 4 عصرا .../رغم أنو النظري إجباري/ ما بتلاقي ولا محاضرة ،ضمن البرنامج الدراسي وهاد الحكي بينطبق على جميع السنوات .

2. السنة الماضية يا أستاذ أحمد خلال الفصلين ...ما داومنا ولا ليوم لبعد الساعة 1:30 ظهرا....>>>وفي أحلى من هيك برنامج.!!!

3. أطول محاضرة عنا ...2 ساعة فقط / مو متل ما ذكر...2:30....فلا تخافوا لأني ...90% المحاضرات مدتها 1:30..ساعة/// لكن يبدو زميلي نسيان.///...ونسيان أنو محاضرات العملي نصفها ما بتطول أكتر من ساعة.

7. دوام النظري الإجباري.........
// مع إني بعرف أنو في فعلا محاضرا نظري حضورها متل عدمه لكن بالمقابل في محاضرات نظري ...ودكاترة متل :د..أنور +د.جبران+د.بسام الطويل...+....بظن أنه الحضور لإلهم بيفيد أفضل من 100كتاب //
و طلاب حلب بيعرفوا لما ما بيكون النظري إجباري ..كم عدد يلي بيحضروا برغبتهم ....؟؟؟!!!

وبالنتيجة بيطلع عنا معلمين فاشلين ...بتعرف ليش؟؟؟ مو بس لأنو ما استفادوا من محاضرات النظري ومن الدكاترة ،...لكن لأنهم ماعندهم حس المسؤولية اتجاه اعداد نفسهم للمهمة يلي عم تنتظرهم مستقبلا *معلمين* .....قال.

[حسبي الله]

بالنتيجة:
اعذرني يمكن على ردي القاسي...لكن نقلت النصف التاني للحقيقة يلي تجاهلته ...لسبب واحد إني قضيت بكليتي 4 سنوات ، من أروع ما يكوووون رغم كل شيء فيها .
ومن الوفاء لكليتي... إني دافع عنها... ....هاد غير أنو واجب نحكي الحق.
بتمنى :
نكون واقعين بنظرتنا...ونتعلم أنو قبل مانحاسب غيرنا على واقعنا القاسي ...نسأل حالنا نحنا شو قدمنا لغيرنا؟؟؟ وشو عملنا لنغير للأحسن... خلينا نحس شوي بروح المسؤولية /على الأقل من خلال دراستنا / ...يلي ...استبدلناها بالسلبية و بروح التشكي ...

وبتمنالك أخي :
أوقات سعيدة أكتر ...تقضيها بكليتك ...خلال هل كم شهر يلي بقو إلك فيها.

وآسفة :
على هل الرد الطووووووووووووووووووووووووووووووووويل.

[احمد الحاج شعبان]

لك يا شباب طولو بالكون علينا والله ما عم جيب هل الحكي من عندي وكل هذا واقع عشته انا وكثير من زملائي اللي جايين من غير محافظات وحاولو تسألو الطلاب المغتربين عن بلدون وشوفو قديش معاناة كبيرة بس انا اسف اني شرحت معاناتي قلت لعلي اجد شيء من المواساة بس الظاهر طلعت انا الغلطان ومتل ما بيقولو خليها بالقلب تجرح ولا تطلع لبرا وتفضح
انا بعتذر من الكل اذا كان بدر مني اي اساءة لادلب او اهالي ادلب او الدارسين في ادلب وبتمنى تقبلو اعذاري
بس عندي مداخلة للاخت سمر لاني حسستني اني مسيىء كتير بجملة...........لكن يتذكر أنه :

تنتهي حريته عندما تبدأ حرية الآخرين .بتمنى بس توضيح لهل الفكرة من الانسة سمر وبرجع بكرر اعتذاري للجميع

[احمد الحاج شعبان]

لك يا شباب طولو بالكون علينا والله ما عم جيب هل الحكي من عندي وكل هذا واقع عشته انا وكثير من زملائي اللي جايين من غير محافظات وحاولو تسألو الطلاب المغتربين عن بلدون وشوفو قديش معاناة كبيرة بس انا اسف اني شرحت معاناتي قلت لعلي اجد شيء من المواساة بس الظاهر طلعت انا الغلطان ومتل ما بيقولو خليها بالقلب تجرح ولا تطلع لبرا وتفضح
انا بعتذر من الكل اذا كان بدر مني اي اساءة لادلب او اهالي ادلب او الدارسين في ادلب وبتمنى تقبلو اعذاري
بس عندي مداخلة للاخت سمر لاني حسستني اني مسيىء كتير بجملة...........لكن يتذكر أنه :

تنتهي حريته عندما تبدأ حرية الآخرين .بتمنى بس توضيح لهل الفكرة من الانسة سمر وبرجع بكرر اعتذاري للجميع