الزواج على اصولة

[عاشق حلب]

"بسم الله الرحمن الرحيم"

اصراحة الموضوع دة نقلتة من منتدى لانه عجبنى قوى قوى

طبعاً كلنا عارفين إن الجواز و العش الكميل الهادي هو المشكلة الكبرى في أيامنا الحلوة دي و طبعاً كلنا عارفين برده إن الدنيا بتغلى و مش عارفين هتوصل بينا لحد فين لكن اللي كلنا متأكدين منه إن نسبة العنوسة بتزيد و بالرغم من الأفراح الكتيرة اللي بنشوفها و نسمعها و نزغرتلها و نرقصلها كل يوم إلا إن ده كله نقطة مية في محيط كبيييييييييييييييييييييييير، و معظمنا عارف، ده إذا مكناش كلنا عارفين إن الدراسات الأخيرة أثبتت إنه حتى لو الشباب طبق الشرع و إتجوز أربعة هتفضل برده نسبة كبيرة من البنات و الستات من غير جوازات .

معلش طولت شوية ، ندخل بقى في التفاصيل

نمسك الأول سي آدم المسكين الغلبان اللي حوا ضحكت عليه و طلعته من الجنة و أكلته التفاحة اللي وقفت في زوره و بنشوفها بارزة كده و شكلها غريب ، سي آدم نسي إنه مشترك معاها قي الجريمة و إن شوشو وسوس لهم الإتنين مع بعض و إنهم الإتنين فكروا و قرروا و نفذوا في نفس الوقت .

المهم ، ما علينا

ندخل بقى في تفاصيل الجواز من أول التفكير ونشرحها في الصفحات الجاية .




أولاً : التفكير :-

عند التفكير في الجواز يبتدي آدم في وضع المواصفات اللي عايز حوا تكون عليها من البشرة البيضاء للشعر الناعم للقوام الممشوق للعينين الملونة للمناخير اللي زي النبقة للشفايف اللي زي الفراولة و طبعاً مننساش الصوت الناعم الرقيق و الضحكة الحلوة و صفين اللولي و طبعاً علشان يلاقي ده كله يقعد في قرابيز أمه بالسنين(( إلا من رحم ربي !)) وسعتها بينسى الأدب و الأخلاق و إن البنت مش لازم تكون حتة من السكر ، ده حتى النمل ياكلها و في الآخر متلقيش منها حاجة ، لأن ممكن يكون جمالها من 60 : 80 % لكن روحها حلوة و دمها خفبف و مش شايفة نفسها على غيرها من البنات ، لأن طبعاً الجمال نسبي .

وعلشان ما نظلمش الشباب ، هنتكلم برده على الست هانم حوا اللي برده يوم ما تيجي تفكر في الجواز تروح تحط قائمة طويلة عريضة مليانة ممكن كمان تكتبها وش و دهر للشروط و أنا بقول عليها شروط لأنها عمرها ما كانت مواصفات ، من عمر البشرية و هى بتحط شروط ، طيب ليه ، يعني هى اللي إنشاء الله كاملة متكاملة و معندهاش أي نقص .

نصيحة خدوها من شخصاية بني آدماية لسة ما جربتش ، بس إن شاء الله هتجرب ، بلاش تحطوا مواصفات صعبة تكاد تكون مستحيلة علشان ربنا يكرمكم و تلا قوا اللي يعوض عن الأيام الصعبة اللي يمكن نكون مرينا بيها قبل كده .






ثانياً : البحث و الإيجاد :-

بعد البحث والتنقيب الطويل و المتفحص و المتمحص ، يجد الشاب و الفتاه ما يريد أو مالا يريد ، و طبعاً في الأول اللي بيلاقوه بيبقى هو المراد و بيكتشفوا بعدين إن البضاعة مغشوشة يا معلم ، هتقلولي إزاي ؟؟؟

بالنسبة للواد لو كان غلبان و مواصفات شريكة العمر :

(1) البشرة البيضاء / مكياج و شوية ألوان .

(2) الشعر الناعم /مكوي يا حبيبي .

(3) العنين الملونة / عدسات يا روحي .

(4) القوام الممشوق / سوفت ،إلا إذا كانت رشيقة طبيعي .

(5) الشفايف / روووووووووووووووج على رأي محمد صبحي .







أما بالنسبة للبنت ، نشوف شروطها كانت إيه :-

(1) طيب و غلبان / ده تمثيل يا ختي .

(2) كريم و سخي / ده في الأول بس يا عنيا .

(3) مرح / بيتعلم كام نكتة بايخة من أصحابه و ييجي يقولهم لك .

(4) يقول كلام حلو / بيحفظه من الأفلام ويسمعهم لك .

(5) يكون شيك / طول عمره معفن و يتشيك عشان يلفت نظرك .

(6) بيتعطر / يا حبيبتي الجربان جربان و لو رشوا عليه بارفان .



وبعد ما شفنا كل واحد بيضحك على الثاني إزاى نشوف و نطلع و نتعرف و نتشرف بالمراحل اللي بعد كده .







ثالثاً : الخطبة :-

خلاص ،العريس أخد قراره و إختار فتاة أحلامه ، اللي مسهراه الليل ، و منيماه نهاره ، ما هو لازم ينام بالنهار ما دام سهر بالليل .

و العروسة ، أخيراً لقيت فارس الأحلام اللي طاير على الحصان الأبيض ، مش عارفة أنا حصان أبيض إيه و إ حنا في الألفية التالتة دلوقتي .

ما علينا ، طبعاً كلنا عارفين فترة الخطوبة و اللي بيحصل فيها ، البصات و النظرات والهفتات و اللفتات على رأي الست نجاة .

و بالرغم من إن فترة الخطوبة المفروض للتعارف و الحصول على معلومات عن الخصم إلا إنها بتتبخر من حرارة كلام الحب الجميل والكلام المعسول الملبك الملزق و تضيع في بحبك وحشتيني بحبك وإنتي نور عيني و يا غالي عليا و صدفة و حلو وكداب و عيش بقى مع العندليب .

إتكلموا في المستقبل أحسن ، بدل ماتضربوا بعض بالشباشب بعد كدا .





رابعاً : الجواز :-

كلنا عارفين إن الجواز هو دايماً البطيخة اللي في الغالبية بتكون قرعة , و بعد ما ينتهى شهر العسل

اللي هو أصلاً ما بيزيدش عن أسبوع و في أحيان كتيرة بيتقلص و يبقى { 3} أيام بس , بتظهر الحقيقة

المرة , و مهما طالت فترة التمثيل , كل واحد بيزهق و ما بيقدرش يكمل , و ينتهي الكلام اللي ما

مكنوش لاقيين وقت علشان يقولوه , و يحدث ما يسميه العلماء بـ { الخرس الزوجي } وساعتها

يغنيلهم محمد حماقي { خلص الكلام } , و إذا مكنوش بيحبوا بعض بتزيد المشاكل يوم بعد يوم

أ ما إذا كانوا بيحبوا بعض ممكن جداً تتحل المشاكل بضرب الشباشب و, ولو بصيت حواليك هتلاقي

النماذج الفاشلة كتيييييييييييييير , ربنا ما يجعلنا منهم .





الحب في رأيي :-

لما تحب الشخص اللي قدامك , تفرح خالص خالص لما تشوفه و لو حتى من بعيد , وتحب إنه يكون قريب منك علطول وتحب دايماً تشوفه فرحان ومبسوط ويا سلام لو كنت إنت سبب فرحته , وتحب تسمع صوته وتحس إنه أحلى من صوت العصافير , وإذا كلمك تبقى منتبه معاه ومش عايزه يسكت أبداً , وتلاقي نفسك بتعمل كل حاجة بيحبها , و ما تحبش تزعله أبداً , و الحب يعني تفاهم , واللي بيحبوا بعض بجد يفهموا بعض من نظرة العين , و كل واحد يحب التاني يظهر في أحسن صورة , وتلاقي كل واحد يمدح التاني في غيابه و حضوره , ومش نفاق لكن حب .














الموضوع ده من تأليفى و يعتبر من اوائل كتاباتى الشخصية ... يمكن تقولوا انى متشائمة او معقدة ....لكن بذمتكم مش ده بيحصل ؟؟؟؟؟؟؟؟؟؟؟