لمحة عن مواد الفصل الأول للسنة الثالثة

[Zaher]

إليكم يا زملائي لمحة عن مواد السنة الثالثة :

1- تقنيات التعليم : د : محمد شاش : مادة حلوة وسهلة والدكتور محمد كتير رائع ، ونسبة النجاح في هالمادة أعلى من بقية المواد وما بيرسب غير اللي بيكون مكون فكرة سلبية عن هالمادة وعن الدكتور ، هوي صحيح الأسئلة اللي بيجيبها ما إلها علاقة بالمادة وبيغير نمط السؤال ، بس الشي المنيح إنو الواحد بيأخذ حقه وزيادة ولذلك أنا أحترم الدكتور محمد بيعطي كل طالب حقه وزيادة ودائماً بزيد (5) علامات وبعمره ما نقص علامة .
العملي في هذه المادة بتأخذوه في مخبر التقنيات وهو عبارة عن أعمال تطلب منكم ( لوحة جيبية ، وبرية . . . . . ) وبتحضروا درس وبتستخدموا اللوحات أثناء إعطاء الدرس ، والدرس بتعطوه أمام زملائكم ، والعملي فيو كتير حلو والعمل مقسم بين (5) طلاب بيعملوا اللوحات وبتقدموا الدرس مع بعض كل واحد بيعطي هدف .

2- المناهج التربوية : الدكتور أنور حميدوش : هذه المادة علامتها من 100 ما فيها عملي ولذلك اللي بيحسب علامته 40 وفوق بينجح فيها ، والمادة حلوة وأبحاثها عدت معكم بالأصول وفي أبحاث بدها تعدي معكم بالطرائق ، يعني مادة تربوية شو بدي أحكي عنها أكيد سهلة وممتعة ، وشو ما كتبتوا بتأخذوا عليه علامات ، ودائماً هناك زيادة في العلامات، والطلاب تفاجئوا بالفصل الأول لأنو كل واحد أخذ أكتر من يلي توقعوا .

3- طرائق التدريس (1) : الدكتور معلى : مادة مؤتمتة ، من أهم المواد اللي لازم تركزوا عليها وتحضروا محاضراتها ، يعني صحيح ما حدا بيرسب فيها كونها مؤتمتة وسهلة ، بس الدكتور معلى شرحوا كتير حلو .
والعملي فيها عبارة عن حلقة بحث متل الأصول بتكتبوا عن طريقة وبتحضروا درس عليه ، واحتفظوا بالحلقة للفصل الثاني للطرائق (2) .

4- الحاسوب التربوي : الدكتور إبراهيم اليماني : ما بظن حدا داخل عالمنتدى وما بيعرف يستخدم الحاسوب يعني ما حدا رح يحمل المادة ، أكيد الكل مأمن النجاح فيها ، بس هي المادة مادة معدل واللي بيقدمها بالفصل الثاني بيجيب 100 فوراً لأنو بالفصل الثاني الأسئلة شبه مؤتمتة ، وحتى بالفصل الأول بتضمنوا فوق الـ90 ، والدكتور بينزل محاضرات بالمكتبة بس هنن وقلتهم ، يعني بالدرجة الأولى التركيز على العملي ويلي بيعرف يطبق عملي بروح عالفحص مرتاح بس بدو يتخيل جميع العمليات على الحاسوب ، والدروس هي : التعرف على مكونات الحاسب + الويندوز + ما يكروسوفت أوفيس ( وورد + بوربوينت + اكسل ) ، يعني كتير سهلة وما بيحملها إلا اللي بعمره مو شايف حاسوب .
العملي بتأخذوه بصالة المعلوماتية جانب القاعة (129) وكتير حلو وممتع وبيقسموكن لزمر .

5- رياضيات ( عمليات حسابية ) : السنة الماضي أعطانا إياها الدكتور مضر لبه ، بس ما بظن حدا حملها على السنة الرابعة إلا قليل جداً وعلى الأغلب كل طلاب السنة الثالثة انحظوا بهالمادة وطالعوها ، هلق هوي صحيح الدكتور تصحيحه شوي صعب بس بالمحاضرة الشهادة لله بيشرح وكأنوا عم يعطي دورة خصوصية والأسئلة صعبة شوي بس كل الطلاب فهموا هالمادة ، وإن شاء الله يبقى عليكم لأنو طلاب الأدبي بطالعوها وطلاب العلمي بيجيبوا (100) لأنو كان عنا كتير طلاب أخذين 100 .
العملي : عبارة عن امتحان يقدم في نهاية الفصل متل رياضيات أعداد بالسنة الثانية تماماً .

6- دراسات باللغة الانكليزية : صحيح المادة غير مؤتمتة بس صدقوني أسهل من الأتمتة بكتير والكمية اللي بتأخذوها قليلة ، السنة الماضي أعطانا إياها الأستاذ أحمد ملاح ، بس على ما أظن هالسنة ما يعطيها ، بس إن شاء الله يعطيكن إياها لأنو أسئلته كانت كتير سهلة .

7- مفاهيم فيزيائية وكيميائية : من أقل المواد التي تحتاج إلى دراسة والأسئلة مبينة والمادة كلها عبارة عن نظري ، يعني الدكتور رضوان دائماً بيجيب الأسئلة سهلة ونظرية ، فقط بيجيب مسألة بـ16 علامة وحتى المسألة بيجيبها بالفصل الأول من بحث ( علم الحركة ) وبالفصل الثاني بيجيبها من بحث ( الضوء ) .
العملي في هذه المادة : عبارة عن امتحان يتم تقديمه في نهاية الفصل ، بس ما خرب بيت الطلاب إلا العملي لأنو غالباً العلامات متدنية لمعظم طلاب الأدبي وتتراوح العلامات بين 0 - - - 4
أنا أخذت بالفصل الأول 2 وبالنظري 46 حملتها 48 ، عدت العملي بالفصل الثاني جبت 4 وعدت النظري جبت نفس العلامة 46 + 4 = 50 .
يعني ما بدي خوفكن من العملي اللي بينتبه بيمشي حاله .
هلق هي المادة مادة معدل وكتير سهلة ، بس بالفصل الأول كان عندي معها بنفس اليوم تربية خاصة ، وبالفصل الثاني درستها بيوم لأنو كان عندي قبلها مادة ، والله رحمني وطلعت معي .

والله كتابتي صارت جريدة على أساس لمحة ، بس آه على أيام الثالثة وبالمناسبة السنة الثالثة أسهل من السنة الثانية بكتير .


واللي عنده أي استفسار أنا جاهز ، مع تحيات Zaherسنة رابعة معلم صف

وبالتوفيق للجميع