معلم صف فاشل ....ليش؟

[سمر]

السلام عليكم ورحمة الله وبركاته :
معلم صف فاشل ل ل ل ل ل ......ليش ش ش ش ش ش ؟

اسمعوني منيح لسا القصة جديدة ...ومامضى عليها أكتر من 6 ساعات ياشباب ،وأنا بصفتي شاهد عيان فشاهدتي مقبولة أكيد ،وبصفتي أحد شخصيات القصة ،فمعناتها مانها غيبة أو نميمة ...
المكان: مدرسة ..؟..؟..؟..في إدلب الخضراء.
الزمان : اليوم :الإثنين 10/5/2010 م.
الصف : الرابع الأساسي .
الطالب /المعلم :.؟.؟.؟.طالب سنة ثالثة معلم صف .

الطالب/ المعلم المرافق : أنا *سمر*...بصفة تربوي مشاهد ،ومراقب عام على سير الدرس .
مشكلة البحث :
فجأة ،تستيقظ على حقيقة مرة ....لقد خدعنا أنفسنا وخدعونا عندما زرعوا في عقولنا أننا كطلاب كلية تربية ، قد تم اعدادنا بما يضمن لنا أن نكون مميزين عمن سبقونا من خريجي معاهد التربية من حيث (القدرة على التعامل مع الموقف التعليمي بأساليب تربوية حديثة ، سواء من حيث الاستخدام الفعال لتقنيات و طرائق التدريس الحديثة ،أو من حيث القدرة على التعامل مع الطلاب ،....الخ من الأشياء التي لطالما حلمنا أننا تمتلكها فعلا ).....لكن فجأة نكتشف أننا فعلا غير مؤهلين ...وبأن معظم الكلام النظري الذي تعلمناه ليس قابل للتطبيق على واقعنا ، أو لنقل لم يعلمونا كيف نكيفه بما يتلائم مع واقعنا ...
هدف البحث :
لغاية في نفس يعقوب .
الإطار العملي :
في تمام 30 :12 بدأت قصتنا ...بكثير من التفائل ....وقليل من التوتر دخلت زميلتي الصف "يعني مأمني طلاب صف رابع ...أكيد التعامل معهم متمتع وسهل "
الدقائق الأولى كانت تبشر بالخير وبأن الأمور قد تسير على مايرام ...فقد راحت زميلتي تقنع نفسها وتقنع الطلاب أنهم طلاب مميزون ...وبأن الانتباه والهدوء والتفاهم هو سيد الموقف هنا
وللوهلة الأولى =/5.د/ ...شخصيا اقتنعت معهم أنهم طلاب غير شكل ...
لكن ما إن انتهت المدة المحددة حتى ظهر الطلاب على حقيقتهم ...وظهرت قدراتنا على حقيقتها ...
35 طالب يصنفون كالتالي (( 8مشاغب ووقح درجة أولى + 12مشاغب وكسلان درجة ثانية + 10 طالب نشيط بس مؤدب + 5 طالب لا منتمهم ولا منكمهم ))...


***********

الموقف الأول : فوضى عارمة تعم الصف ....وسببها طلاب الدرجة الأولى ،زميلتي زادت الأمر سوءا بصراخها وتوترها الذي لم تستطع إخفاءه .
....المشكلة علمونا : لازم نضبط الصف ، وووووكتير مهم الضبط ؟ووووتعبك وتحضيرك بروح على الفاضي إذا ما انضبط الصف ....بس نسوا يعلمونا كيف،ممكن نضبط الصف .

الموقف التاني : لما حاولت المعلمة التفاهم مع طلاب د1 +د2 ولم يجدي معهم الترغيب ولا الترهيب ...وصوتها كاد يختفي قال يعني تدخلت أنا لأقنع رئيس شلة المشاغبين ومساعده ، ليسكتوا شوي ،فأخبرته أن قلة احترامه تعكس مدى تربية أسرته له وتنقل لنا صورة عن مدى احترامهم ...فحزروا شو قلي : الكلام من صفة المتكلم ....ومن دون ما يرفله جفن ....فقام دافعت عني يعني زميلتي وبدها تنقذ الموقف ، فقالت للآخر "أنتو فعلا مابتفهموا"...فما كان منه إلا أن اتحفنا بسرعة بديهته قائلا ...."أصلا أنا دائما بقول الحكي يلي بينحكى معي بيرجع لصاحبه .."



يا سلام : على هل الورطة والبهدلة قدام الطلاب ....وقحين ومشاغبين وبيردوا بدل الكلمة عشرة ...والله موقف غيرشكل ، شو بدنا نعمل وباقي الطلاب عم يسمعوا المحاورة؟؟؟ لك وين "التربية الخاصة "+"علم النفس التربوي"؟؟
شخصيا : سكتت وقلت كسار يفخر بعضه وما فتحت تمي بحرف لآخر الدرس وقعدت صورهم بالفيديو وأنا قاعدي آخر مقعد .....بس رفيقتي تركت الحكي على جنب ، وجابت العصاي ، بس يا شباب فالج لا تعالج...طلعوا مابيعرفوا لا الحياء ولا الخوف كمان .



الموقف الثالث : زميلتي على السبورة عم تكتب قام قامت طالبة :وقالتلها "آنسة هاد عماد بيحب شمس وقال بدو يتجوزها " ، فقام رفيقتي عصبت وقالتلا :"هلء وقت المسلسلات انتبهي للدرس "....بس المشكلة إني الطلاب قالوا بصوت واحد "آنسة ،أي عنجد هادا عماد هيك قال لشمس" ....يعني طلعوا ،النجوم من نفس الصف ...بس لا تسألوني شو كان ردها ، .....silent ......سكتت وعملت حالها ما سمعت شي ، لأني فعلا ماعلمونا شو ممكن نتصرف بهيك موقف أولا ....وثانيا: ما توقعنا يطلعنا هيك موقف مع طلاب صف رابع ....

الموقف الرابع : والله ما بينحكى ، شو موقفك؟ وشو ممكن ترد ؟ إذا سمعت من أطفال صغار كلام مزعج /محرج.

The end : يعني بالنهاية (3حصص) فشلوا وما تحقق من أهداف الدروس الثلاثة أكتر من 50% ، مع العلم إنيزميلتي ....الحصة الأخيرة فركتها من نصها لأني "السير عندهن ما مأمن " وبقيت أنا لوحدي مع الطلاب ....بس لا تقولوا كملي لأني صعب أكيد ...

***وهيك توتي..... توتي .....خلصت الحتوتي .....مع تمنياتي لكم بواقع أجمل ،إن شاء الله يا أغلى زملاء .

[سمر]

Question : على مين الحق ، ؟؟؟؟؟؟؟

اختار الإجابة ،الأكثر صحة :




1* نحنا

2* هم (طلاب )

3* هم (أسرة ومجتمع )

4* هم (مسئولون عن التخطيط :كلية التربية الثانية بإدلب /مثلا ).

[سمر]

زملاء : يمكن ،آآآآسفة على نقل الحقيقة ، بس أكيد ماهدفي نتسلى ونضحك "مع إني شر البلية مايضحك" ...هدفي إني نفتح عيونا على مشكلة ،يمكن ما نكتشفها إلا فجأة بموقف قاسي متل المواقف السابقة وما خفي لأعظم ،...... وقتها يمكن نصحا ونقول في خطأ؟؟؟وأنا لأي حد أنا استفدت من دراستي ؟؟؟

[سوري أصيل*]

برأيي الغلط من الاسرة والمجتمع
لاني بتذكر بالصف الابتدائي كتير كنا منضبطين وعال العال لنو اهلنا علمونا احترام الاكبر منا ..... فييف لو كانو اساتذتنا ؟؟؟

الله يكون بعونكن على هالجيل ..........................

[alaakh88]

عن واقع تجربة شخصية وخبرة غيري:
أولاً: خبرة غيري: أختي اتخرجت السنة الماضية من كلية التربية بحلب وعندما بدأت بالتدريس كانت المفاجأة حيث أن الكلام الذي كان موجود في منهج الكلية لم يكون موجوداً على أرض الواقع أي أن الكلام كان مجرد نظريات وهمية.
ثانياً التجربة الشخصية: في الفصل الأول طلب مني تصويري وأنا عم أعطي درس في المدرسة في مادة أصول التدريس ولكني عندما ذهبت في المرة الأولى كانت لي صدمة قوية حيث أني لم أستطع أعطاء الدرس فقضيت الدرس على خلص يا طالب ويا طالبة بس في المرة الثانية شو سويت؟؟؟؟
دخلت الصف وفي أيدي عصاه وقلت بالحرف الواحد (( أسمعو يا طلاب عندي درس واحد , يلي اسنعو عم يحكي حرف واحد بدي أمسح في المدرسة كلها, طبعاً هالحكي كان مع العين الحمرا))
يمكن كان درسي 55 دقيقة ولا صوت طلع من الصف حتى وقت دق الجرس على الفرصة مافي ةلا طالب تحرك من محلو!!
أنا بحمل الحق على المدرسة بالدرجة الاولى "" استاذ الصف"" لأنو وقت بيحسن ينظم الصف بأول الدوام يستمر الصف على هذا التنظيم إلى نهايه السنة.

شكراً سمر على طرح متل هيك موضوع.
وتقبلي من هالرأي الشخصي وشكراً

[سمر]

سوري أصيل شكرا لمرورك ....وفعلا هلأ مو متل قبل ...الرفق واسع.
علاء ...منور الموضوووووع
كمان أنا معك بيلي قلته. .....يمكن هو اللقاء الأول يلي بيحدد الخطوط الرئيسية طول السنة ، مع تمنياتي بالتوفيق للجميع .

[Zaher*]

زملاء نحنا سنة رابعة وكان عنا استاجات بالفصلين وإذا بدنا ندخل في التفاصيل بدي بما لا يقل عن صفحتين ، بس إذا بدنا نحمل المسؤولية لحدا ما بيطلع حدا غلطان .
- إذا بدنا نحمل المسؤولية للكلية كمان الطلاب مقصرين وجداً ، يعني نحنا ما عنا دافع شخصي لنطور حالنا أو على الأقل ما عنا دافع لحضور المحاضرات .
- وإذا بدنا نحمل المسؤولية للأجيال كمان هنن عندن طاقة وبدهم أسلوب يجذبهم ، يعني نحنا طلاب كبار ومربين والدكتور والأستاذ بيبقى ساعة فقط لبين ما يسكتنا فكيف طلاب صغار .
- وإذا بدنا نحمل المسؤولية لمعلم الصف كمان المعلم عندو 40 طالب بالصف ومن بيئات مختلفة ما خرج يوفق بين إنهاء المنهاج وحل مشكلات الطلاب .

زملاء برأيي لا أحد يخرج من إطار المسؤولية ، ولكن المسوؤلية الأولى والأخيرة منوطة بالدرجة الأولى على الأسرة فهي أولى مؤسسات التنشئة الاجتماعية وطالما إنك يا زميلة سمر صنفتي 10 طلاب بين نشيط ومؤدب وهم من نفس الصف وعند نفس الأستاذ ، فمعناها هم يحملون تنشئة صالحة .
لذلك هي نصيحة للجميع : كل شخص يبدأ بتربية أبناءه لأنو المجتمع ما رح يربيلو إياهم ، بالعكس رح يخربهم ، ولذلك الضبط الذاتي يأتي من الأسرة أولاً فاحرصوا على تربية أبناءكم .

مشكورة سمر عالطرح المميز ونحنا فعلاً عانينا هالأمر أنا وجميع زملائي في التربية العملية وبحضور المشرف . . . . . .

وبنصحك إذا بقيت مشاريع التخرج للسنة القادمة وما التغت إنك تبحثي في هذه المشكلة ورح ينبسط عليكي الدكتور المشرف ورح يكون موضوعك مميز ورح يبقى بالكلية ضمن المواضيع المميزة والجادة .

تقبلي مروري ورأيي

[سمر]

زاهر شكرا لمرورك الرائع .....ولردك الأروع .

100% ،أنا معك إني كل مربي فينا لازم يسعى ليطورا حاله بحاله ، هي إذا كان فعلا مهتم ومقتنع بمهنته...ومعك بأني لسا في خير وبأني الأمل موجود بينا ....و بأن الأسرة هي صاحبة الدور رقم واحد بالتربية .

بس نقطة الاختلاف : هي بإني المسؤول الأكبر -أكيد مو الوحيد -عن المشكلة هي الكلية ، ليش ؟

لأني أكيد أنا كطالب كلية تربية لما بدرس لمرة واحدة بس شي اسمه "طرائق تدريس " خلال أربع سنوات وما عاد اسمع فيه بعدين .... ...فأكيد بدي حط سؤال ، ليش ؟؟؟؟...ولما بسمع بشي اسمه "مهارات التواصل *بس باللغة الأجنبية ،فلأي حد أنا ممكن استفيد من هيك مادة أنا فعلا كمعلمة بحاجتها مستقبلا...؟ ....و لما بقضي فصل كامل وأنا عم اتعلم اكتب الأعداد عند الفراعنة وعند السومريين ، بس فعلا ماعلموني كيف ممكن حضر درس رياضيات بطرق حديثة ....وقتها ما بقدر قول إني استفدت من مقرر *رياضيات واعداد *......الخ.....يمكن الحكي هون كتير وأنت أدرى زميلي : زاهر .



***أكيد لما منحكي هل حكي ...ما منكون عم نتبلى حدي ...بس أنا كطالبة سنة ثالثة ، منحقي وحق زملائي ، طلابي مستقبلا إني كون فعلا استفدت من مقرراتي ...بالدرجة يلي يفترض إني نوصلها كخريجين كلية تربية ....


وما منختلف إني من حق كل واحد يدافع عن حقه ....وإني من واجب كل واحد رضي يكون بموقع مسؤولية إني يقدم الأحسن والأفضل دوما .

[RED ROSE RORO]

موضوووووع للنقاش حلووو

بس انا سنة أولى ..... لسى ما بعرف كتيييير

قرأت ردودكم ..... وفهمت الوضع

[سمر]

أكيد منووووورررررة بمرورك الرائع .....حبيبتي .